கனவுப் பக்கங்கள்

உனக்கான எனது கனவுகளை

எடுத்து வைத்துக் கொண்டு

ஒவ்வொரு பக்கமாய்

வலிக்காமல் புரட்டிக் கொண்டிருக்கிறேன்...

கருப்பு வெள்ளையில்

விரியும் காட்சிகள் அனைத்தும்

நீ இருப்பதால்

வண்ணங்களை

வாரி இறைத்துக் கொள்கின்றன...

வெள்ளை தேவதைகளுக்கு நடுவே

நீ மட்டும் அழகாய்

அதுவரை வெறிச்சோடியிருந்த

என் வானவீதியில்

தேவதைகள மன்னிப்பார்களாக...

முடிவுகளே இல்லாத சாலைகளில்

நீயும் நானும் மட்டும்

மௌனங்களில் பேசிக்கொண்டு

விரல்களில் சிக்கிக்கொண்டு...

கண்முன் விரியும்

என் தோட்டம் முழுதும்

பலவண்ண மலர்கள்

கையளவு

உன்மீது வீசுகின்றேன்

அத்தனையும் மலர்ந்து

உன்னை சூடிக்கொள்கின்றன...

உறைய வைக்கும் பனியில்

என் இடைசூடிக் கொண்டு நீ

எதிரில்

மெல்லத் திரை விலகுகிறது

வசந்தம்

ஆயிரமாயிரம் வண்ணங்களில்

மலர்கிறது...

வானத்தோடு முத்தமிட்ட

கடல் – அதன் முன்

எல்லையில்லா மணல்

ஒரே புள்ளியாக நாம்

விளையாடிக் கொண்டிருந்த அலைக்கு

ஏதோ ஆசை வந்து

உள்ளே இழுத்துச் சென்றாள்

ஆழத்தில் கட்டி வைத்த கூட்டுக்குள்

இட்டுப் போனாள்

முத்தமிட்டுக் கொள்ளும் மீன்களுக்கு நடுவே...

நிலவின் நிழலில்

புன்னகையில் நீயும்

கைகட்டிக்கொண்டு நானும்

மோகன ஆராதனை

தலை கோதும் கைகளும்

முத்தம் தேடும் இதழ்களும்

முடிவில்லா ஆரம்பம்...

கலைந்து விழிக்கையில் எல்லாம்

பக்கத்திலேயே நீ

காயாத முத்தங்களும்

மாறாத வாசமும்

என்னுடனேயே பயனிக்கின்றன...

உன்னால் மட்டுமே முடிகிறது

நீ

இருக்கும் தருணங்களில்

சந்தோஷங்கள்

தானாக வந்து ஒட்டிக்கொள்கின்றன

துன்பங்கள் யாவும்

தள்ளி நின்று பார்க்கின்றன...

ஆரம்பத்தில்

என்னை உன்னிடம்

இழுத்து வந்த மோகத்தையும் தாண்டி

இந்த நேசம்

ஆழமாய் வளர்ந்து

என்னையும் உன்னையும்

இறுக்கிப் போட்டுள்ளது...

என் துன்பங்களையும்

இனிக்க வைக்க

உன்னால் மட்டுமே முடிகிறது

உன் அருகாமையால்...

என் மௌனங்களை

உன்னால் மட்டுமே

மொழிபெயர்ப்பு செய்ய முடிகிறது...

உன்னுடைய தோளில் மட்டுமே

எவ்வித சலனமுமின்றி

அனுமதி கேட்கும் தயக்கமின்றி

சாய்ந்து கொள்ள முடிகிறது

என் தாயின் மடிபோல...

வெய்யிலின் கொடுமையிலும்

சிலுசிலுவென

தீண்டிவிட்டு போகிறது

உன் நினைவுகள்

நீ மட்டும்

என்னுடனேயே இருந்துவிட்டால்...

என் அறை முழுதும்

உன்னாலே நிரப்பி வைத்திருக்கிறேன்

என் சுவாசமெல்லாம்

நீயாகவே இருக்கிறாய்...

என்னை கொஞ்ச

நீ சேயாகிறாய்

நானும் உன் மழலையாகிறேன்...

யார் நீ

என்ற கேள்வி

அதன் பதிலை தேடிக்கொண்டிருக்க

நான் இங்கே பத்திரமாய்

உன்னுடன் நீயாக...